شرقی آذربایجانین طبیعی منبعلر ایداره‌سی‌نین رئیسی دئدی: اوستاندا 160 مین هکتاردان چوخ 7 بؤحران مرکزی وار کی اونلارین چوخو اورمیه دریاچاسی‌نین اطرافیندا یئرله‌شیر.

فارسین تبریزدن وئردیگی معلوماتا گؤره, سیروس داودی صحرالاشمانین قاباغین آلما گونو موناسیبتینه خبرنیگارلارا دئدی: صحرالاشماغین ضررلری‌نین قاباغین آلماغا گؤره اوستاندا چوخلی ایشلر گؤرولوب کی او جومله‌دن 140 هکتار یئرده آغاج اکیلماقدان آد آپارماق اولار. 338 هکتارلیق اکین یئرلرین اطرافیندا یئل‌سیندیران قوشولوب و 175 هکتار یئرده مرتعلرین احیاسی اوچون توخوم سپیلیب و ایصلاح عملیّاتلاری آپاریلیب.

او دئدی کی ایداره‌نین اصلی برنامه‌سی جماعتین موشاریکتیندن حداکثر ایستیفاده‌نی آپارماقدیر.

شرقی آذربایجانین طبیعی منبعلر ایداره‌سی‌نین رئیسی آرتیردی: بونا اینانیریق کی صحرالاشماغین قاباغین آلماغا تکجه یول هامی‌نین موشاریکتی‌ایله یاشیل فضانین آرتیرماسی و آغاج اکماقدیر.

داودی بونا ایشاره ائله‌مکله کی صحرالاشماغین قاباغین آلماق مسئول‌لارین اصلی هدفیدیر, دئدی: اومیدیمیز وار بو بخشه لازیم اولان بودجه‌نین تخصیص وئرمگی‌ایله صحرالاشماغین قاباغین آلماغا بیر ایشلر گؤروله.

شرقی آذربایجانین طبیعی منبعلر ایداره‌سی‌نین رئیسی هابئله اوستان جماعتیندن ایسته‌دی اکین یئرلری‌نین اطرافیندا آغاج اکمکله صحرالاشماقلا موباریزه‌ده بیر آددیم گؤتورسونلر.