اخلاصین عبادتدهکی رولو
عزیز پیغمبریمیز (ص) و اماملاردان (ع) یئتیشن روایتلره اساساً عبادتلرین و عمللرین تکجه قبول اولماق وسیلهسی، اخلاصدیر. هر هانسی عبادتین آیری شرایطی اولا آما اخلاصلا توأم اولماسا قبول اولونماز.
اخلاص، عبادتلری فقط الله-ـا خاطر یئرینه گتیرمک آنلامیندادیر. قرآن کریم بیّنه سورهسینین دؤردونجو آیهسینده بویوردوغو کیمی: «فقط اللهی عبادت ائلهماغا و دینی اونا خالص ائتمک اوچون امر اولدولار». اللهین رسولو دا بویوروب: «قیرخ گون اخلاصلا عمل ائتمک نتیجهسینده حکمت چشمهلرینین اورگیندن دیلینه جاری اولمایان بنده یوخدور». و بیر آیری یئرده بویوروب: «خوش او بندهنین حالینا کی عبادت و بندهلیگینی فقط اللهـا خاطر یئرینه گتیرسین.
اخلاص بارهسینده اولان روایتلرین سایی چوخدور و اونلارین بوتونوندن مهم بیر نکته اله گلیر: عمللر و عبادتلرین قبول اولماسینین تکجه یولو اخلاصدیر. عبادتین آیری شرایطی اولسا آما خالصلیگی اولماسا قبول اولونماز.
ریاکارلیق اخلاصین ترسیدیر. اخلاص عبادتلرین قبول اولماسینا سبب اولدوغو کیمی ریاکارلیق دا عبادتلری باطل اولماسینا سبب اولار. ائله بونا گؤره اسلام عالملرینین هامیسی ریاکارلیغین عبادتلرین باطل اولماسینا سبب اولدوغونو دئییرلر. نماز قیلان، ریاکارلیق اوزوندن بیر کلمهنی مخصوص شکلده دئسه و یا ریاکارلیق اوچون مخصوص مکان و زماندا نماز قیلیرسا و یا ریاکارلیقدان اؤترو سجدهسینی و رکوعسونو اوزالدیرسا نمازی باطل اولار.
اوست-اوسته، ریاکارلیق گیزلی شرکدیر. شرکلی عمل عبادتله منافاتلیدیر. ریاکارلیق نه فقط نمازی بلکه هر عبادتی باطل ائلر. خمس، زكات، حج، جهاد و.... هئچ بیرینین ریاکارلیقلا آراسی یوخدور. عبدالله بن بكير دئییر: «حج مسافرتینده امام صادقله (ع) بیرلیکله ایدیک. حضرت یولدا بیر داغ باشینا چیخیب جمعیّتین چوخلوغونا باخیب بویوردولار: «ضجّه چکیب آغلایانلار نه چوخدو و حقیقی حجّ یئرینه گتیرنلر نه آزدیر».
معاذ بن جبل پیغمبر اکرمدن (ص) نبأ سورهسینین 18-جی آیهسی بارهده مفصّل روایت ائدیب کی حضرت بویوروب: امّتیمدن اون صنف مختلف شکللرده محشور اولاجاقلار. بیر صنفی دونوز شکلینده، بونلار دنیادا حرام یئینلردیلر. آیری صنف میمون شکلینده؛ دنیادا سؤز آپاریب گتیرنلر. خلاصه هر عملین عکسالعملی وار.
زلزال سورهسینین 7-8-جی آیهلری بویورور: «هر کیم ذرّه آغیرلیغی قدر یاخشی ایش گؤرورسه اونو گؤرر و هر کیم ذرّه آغیرلیغی قدر پیس ایش گؤرورسه اونو گؤرر.
بو وبلاگدا دين و مختلف موضوعلاردا ال يازيلاريم و عرب دیلیندن چئویردیگیم یازیلار اولاجاق.