استرسدن موفقیته چاتماق اوچون دؤرد آددیم

اوروپا اعصاب علملری محققلرین بیری، استرسین کنترولو اوچون دؤرد مرحله گؤستریب کی اونلاری پیاده ائتمکله استرسلی انسانلارین یاشاییشینی تپ – چئویر ائله‌مک اولار.

دوبلینین «ترینیتی» کالجی‌نین اوستادی، پروفسور یان رابرتسانا گؤره، اونون ارائه ائله‌دیگی یوللارین علمی قایناغی وار و اونو بیر دفعه امتحان ائله‌ین انسانلار، استرسی آزالتماق اوچون داها آیری یولدان استفاده ائله‌مگه حاضر دئییل‌لر. او دؤرد یول، بونلاردیر:

بیرینجی آددیم: اوجا سس ایله اؤز بئینیزه دئیین: بو شرایط، نه ده هیجانلیدیر!

استرسی ترقی‌یه اولان فوق العاده بیر فرصته تبدیل ائله‌مک اوچون، «شرایط نه قدر استرس گتیرندیر» عوضینه، اوجا سس ایله اؤزوزه دئیین: «قاباغا گلن موقعیت نه قدر ده هیجانلیدیر!» بو دئمک، ظاهرده ساده و اهمیتسیز گؤرونسه‌ده، موقعیته نئجه باخماغی بئینه امر ائلیر. مضطرب اولدوغوموز زمان کوتیزول هورمونو آخماغا باشلاییر. بو حالدا بئینین عکس العملی او هورمونون ضررلی و یا فایدالی اولدغونون تعیین ائلیر. بیزیم وظیفه‌میز مناسب موقعیتی بئینین اختیاریندا قویماقدیر کی لازم اولان دستورو وئرسین. بو شرایطده بئینی شرایطین عادی اولدوغونا قانع ائله‌ماق اولماز. فقط اونا القاء ائله‌ماق اولار کی شرایط چوخ هیجانلیدیر.

ایکینجی آددیم: درین نفس آلیب - وئرمک

بو زمانلاردا درین بئش ثانیه‌لی نفس آلماق و آلتی ثانیه‌لی نفس وئرمک لازمدیر. درین نفس آلیب وئرمک بئیینده شیمیایی تغییرلره سبب اولور طبیعی ضد استرس داواسی کیمی عمل ائلیر.

اوچونجو آددیم: بیر سوپر قهرمان کیمی دایانین

اؤزوزه قهرمان ژستی توتون. یعنی صاف دایانین، سینه‌زی قاباغا وئرین باشیزی یوخاری توتون. قهرمان ژستی بئینین داها یاخشی ایشله‌یه بیله‌جگینه اعتمادینی آرتیرار. حقیقتده بو حالت بئینین گوجو و قابلیتینی آرتیرماق اوچون بیر فنددیر. آزمایشلرین نتیجه‌سی قهرمان ژستی‌نین تستوسترون هورمونونون داها آرتیق آخماسینا سبب اولماسینی گؤستریر.

دؤدونجو آددیم: اللریزی یومروقلایین

دؤردونجو آددیم، ساغ الیزی یومروقلاییب 45 ثانیه باغلی، سونرا ایسه 15 ثانیه آچیق و سونرا یئنه 45 ثانیه یومروق شکلینده ساخلاماقدیر. بو عمل بئینین سول طرفینی چالیشدیریب و بدنیزی، ذهنی چالیشما موقعیتینه گتیرر کی استرسدن بدنین ایشینی یاخشیلاتماق اوچون استفاده ائله‌سین.

رابرتسانا گؤره، استرس بؤیوک انرژی منبعیدیر. اونا گؤره اونو استخراج ائله‌ییب موفقیت یولوندا ایشلتمک اولار. یوخسا قوجالماغا، روحی دوشگونلوگه و سرطانا سبب اولار. بو دؤرد آددیمی اجرا ائله‌مک یاشاییشین بوتون بحرانلاریندا یوخاری اعتماد به نفس، یوخاری انگیزه و وصف اولونمایان شادلیغا سبب اولار. عالملرین و هنرمندلرین لاپ بؤیوک اثرلری‌نین یاشاییشلاری‌نین لاپ بحرانلی شرایطینده یارانماسی اصلاً تصادفی و راست گلمه بیر ایش دئییل.

ذکی اولون و عاطفی و اقتصادی بحرانلاری خلاقیت و فایدالی‌لیغین آرتیرماسی یولوندا گوجلو منبعه تبدیل ائله‌یین. یادیمیزدا اولوسون نفس آلدیغیمیز گونه قدر استرس بیزمله وار، اونو موفقیت اوچون فرصته تبدیل ائله‌مک و یا اونا مغلوب اولماق بیزیم اؤز الیمیزده‌دیر.

انسان بئینینه نفوذ ائتمک، ایکی طرفلی قیلینج

عالملر بئیینی اسکن ائتمکله انسانلارین لاپ گیزلی سیرّلارینا ال تاپماق ایستیرلر.

انسان بئینینه نفوذ ائله‌مک عالملرین همیشه‌لیک آرزوسو اولوب. ائله کی تازا چیخان تکنولوژیلارین چوخو بو مقصده چاتماق یولوندا عرصه‌یه گلیب.

بو ساحه‌ده تازا ایشلر گؤرولور. عالملر بئینی اسکن ائتمکله شخصین هویّتی و گیزلی سیرّلارینا ال تاپماق ایستیرلر.

تگزاسین فنی دانشکده‌سی‌ عالملری‌نین تحقیقلری، بئیین دالغالارین اسکنی و یا همان  EEG ایله، بو یولدا بؤیوک آددیم آتماغا اومید اولدوغونو بیلدیریبلر.

بو تحقیقده بللی اولوب کی بئیین دالغالارینی اسکن ائتمکله بئینین خاکستری لایه‌سینه داها آرتیق ال چاتدیرماق اولار. بو دا انسانین ذهنینده گیزلنمیش سیرّلارین آشکار اولونماسی معناسیندادیر.

بو تحقیقلرین ادامه‌سی ایله، شخصی حریمین خطره توشمک باره‌سینده‌ نگرانچیلیقلار دا چوخالیر.

بو عالملرین تحقیقلری بئیین سیگنال‌لاری‌نین بؤیوک بیلگی دنیاسی اولدوغونو آشکار ائلیر کی اونلاری اسکن ائتمکله او اطلاعاتا ال چاتدیرماق اولار.

دعا، بنده‌نین خالقه یاخینلاشماغا لاپ یاخشی وسیله

وَاذْکُر رَّبَّکَ فِی نَفْسِکَ تَضَرُّعاً وَخِیفَةً وَدُونَ الْجَهْرِ مِنَ الْقَوْلِ...([ اعراف ۲۰۵]

قرآندا ایشله‌نن دعا کلمه‌لرینه گؤره دعا کلمه‌سی‌نین آلتی معناسی وار:

1.  آشاغیداکی آیه‌نین دلالتینه اساساً دئمک معناسیندا:

(فَمَا کَانَ دَعْوَاهُمْ إِذْ جَاءهُمْ بَأْسُنَا إِلاَّ أَن قَالُواْ إِنَّا کُنَّا ظَالِمِینَ)[ اعراف ۵].

(ای فما کانَ قولهم اذا جائهم عذابنا) پس اونلارین سؤزو بوندان غیری دئییلدی کی دئدیلر: بیز ظالم ایدیک.

پس نبود گفتار آنان وقتی عذابِ ما به آنان رسید، مگر آن که گفتند: ما ستم کار بودیم.

2. آشاغیداکی آیه‌نین دلالتینه اساساً عبادت ائله‌مک معناسیندا:

(قُلْ أَنَدْعُو مِن دُونِ اللّهِ مَا لاَ یَنفَعُنَا وَلاَ یَضُرُّنَا)[ انعام ۷۱]

بیزه فایداسی و زیانی اولمایان الله‌دان غیرینی عبادت ائله‌یک‌می؟

3. آشاغیداکی آیه‌نین دلالتینه اساساً «بیرینی چاغیرماق» معناسیندا:

(قُلْ إِنَّمَا أُنذِرُکُم بِالْوَحْیِ وَلاَ یَسْمَعُ الصُّمُّ الدُّعَاء)[ انبیاء ۴۵]

من سیزی وحی واسطه‌سی ایله قورخودورام و کار انسان سسی ائشیتمیر.

4. آشاغیداکی آیه‌نین دلالتینه اساساً «کؤمک ایسته‌مک» معناسیندا:

(وَادْعُواْ شُهَدَاءکُم مِّن دُونِ اللّهِ إِنْ کُنْتُمْ صَادِقِینَ)[ بقره ۲۳]

دوز دئییرسیزسه الله‌دان غیر شریکلریزدن کؤمک ایسته‌یین.

5. آشاغیداکی آیه‌نین دلالتینه اساساً «سوروشماق» معناسیندا:

(قَالُواْ ادْعُ لَنَا رَبَّکَ یُبَیِّن لّنَا مَا هِیَ )[ بقره ۶۸]

(بنی اسرائیل موسی‌یه) دئدیلر: اؤز الله‌یندان سوروش کی اونون (اینَگین) اوصافینی دئسین.

6. آشاغیداکی آیه‌نین دلالتینه اساساً «ایسته‌مک» معناسیندا:

(ادْعُ لَنَا رَبَّکَ بِمَا عَهِدَ عِندَکَ لَئِن کَشَفْتَ عَنَّا الرِّجْزَ لنؤمننَّ لک... )[ اعراف ۱۳۴]

بیزیم اوچون الله‌یندان سنین یانیندا اولان عهدیندن ایسته، بیزیم مشکل‌لریمیز حل ائله‌سه سنه ایمان گتیرریک. . .

بیزیم اوخودوغوموز دعا کلمه‌لری بو آخر معنادا (ایسته‌مک) معناسیندادیر. دعادان منظور، الله‌دان ایسته‌مکدیر، یا بو دنیا اوچون و یا آخرت اوچون.

دعالار ایکی جوردولر: بیرینجی دعا ائله‌ینین اؤز کلمه‌لری و هر دیلده بیان اولونا بیلن دعالار کی بونلارا مطلق دعا دئییلیر. ایکینجی نوع دعا دا معصوملارین دیلیندن نقل اولان دعالاردیلار. بو دعالارا «مأثوره» دعالار کی مخصوص یئرده و مکاندا اوخونمالیدیلار. مثلاً: مبارک رمضان آیی‌نین دعالاری و . . .

واراقلامادان کتاب اوخوماق!

آمریکالی محققلر کتابی واراقلامادان اوخوماغی‌نین ممکن اولماسینا بیر یول تاپیبلار.

«گجت ماش»ین وئردیگی خبره گؤره، بعضی کتابلار چوخ قدیمی اولدوقلاری اوچون ظریف و حساس اولورلار و اونلاری آچماق خراب اولماقلارینا گتیریب چیخارا بیلر.

بو اوزدن آمریکانین «ام آی تی» دانشگاهی‌نین محققلری حسابلایان فیلم گؤتورن سیستم دوزلتمکله، کتابی باغلی ایکن اوخوماغی ممکن ائله‌ییبلر.

بو تکنولوژی تراهرتز امواجی ایله کتابین 20 میکرومترلیک صفحه‌لر آراسینی تانییب اسکن ائله‌ییر و نهایتده کتاب باغلی ایکن اوخونور.

بو سیستم حرفلری تفسیر ائله‌مک الگوریتمینه مجهزدیر کی صدمه گؤرن متنلری‌ده اوخویا بیلیر.

بو تکنولوژی ایندیلیکده بیر کتابین فقط 9 صفحه‌سینی اوخویا بیلیر. آما محققلر اونون گلیشدیرمه‌سینه چالیشیرلار.

سیز سئویملی‌سیز یوخسا یوخ؟

بیز کناریمیزدا قالان انسانلاری و ایشلری بیزدن حمایت ائله‌مک حسّینی یارادان انسانلاری سئوریک.

 سیز سئویملی‌سیز یوخسا یوخ؟ حتماً سیز ده ائله انسانلار تانییرسیز کی اطرافداکیلارین نظرینی اؤزلرینه طرف چکرلر ! کاریزمالاری اؤلچولمه‌ین انسانلار آما هامی‌نین اونلارلا راحت اولا بیلن انسانلار.

اونلار بو ایشی نئجه گؤرورلر؟ الله وئرگیسی‌دیر یوخسا تمرین و مطالعه ایله بو یئره چاتیبلار؟ اولا بیلر ایکینجیسی دوز اولسون. اونلارین کلامی رابطه‌سی مناسب اولور. آشاغیداکی 17 عادتی سیز ده رعایت ائلیه بیلسز اولابیلسین کی سیز ده او جور سئویملی اولاسیز:

1. ادبلی اولا بیله‌جکلری یئرده ادبلی‌دیلر.

هر یئرده «لطفاً» «ساغ اولون» کیمی کلمه‌لردن استفاده ائله‌مک واجب اولمایا بیلر آما کاریزماتیک اولماق ایسته‌سز اونلاردان استفاده ائله‌مک سیزه چوخ فایدا وئره بیلر.

2. کیچیک محبتلرین قدرینی بیلرلر.

بیری‌نین سیزدن تشکر ائله‌دیگی زمان «خواهش ائلیرم» سؤزونون تأثیری، «قابیلی یوخدو» و یا «اولسون» کیمی سؤزلردن چوخ داها آرتیقدیر. سئویملی انسانلار تشکر ائشیتمکدن سئوینرلر و سؤزله اونا جواب وئررلر.

3. تعریفلری گئرچکدیر.

کاریزماتیک انسانلارین تعریفی گئرچک اولار. یالتاقلیق ائله‌مزلر و یالان یئره‌ ده تعریفله‌مزلر. بیری تعریفه لایق اولسا دئمکدن چکینمزلر.

4. اورکدن غم شریکی اولارلار.

اونلار «حتماً چوخ افتخار ائله‌دین» و یا «تصور ائلیه بیلیرم نئجه حیرصلندین» کیمی سؤزلردن استفاده ائلرلر. بئله‌لیکله هم اونلارین حسّیاتی ایله یولداشلیق ائلرلر و هم اونلارا ارزش وئررلر. (بیلمه‌لیسیز کی انسانلار هر شئیدن چوخ درک اولماغی سئورلر.)

5. فایدالی بیلگیلری آیریلارلا پایلاشارلار.

بعضیلری بیلگیلری فقط اؤزلری اوچون ایستیرلر آخی بئله بیلیرلر کی فقط بیلدیگی بیلگیلر اونلاری گوجلندیرر. بو جور اولمایین. البته سئویملی انسانلار شایعه‌ ایله بیلگی‌نین فرقینی آنلارلار.

6. آیریلارینا کؤمک ائله‌مگه کؤنوللو اولارلار.

چوخوموزون جامعه‌یه کؤمک ائله‌مگی گؤیلوموز ایستر، آما هاردان باشلادیغیمیزی بیلمیریک. کاریزماتیک انسانلار یاشاییشلاری‌نین هر آنیندا فقط دؤره‌برلرینه باخارلار و بو یئرلری چوخ راحت تاپیرلار. (کؤمکلیک سیزین دالیزجان گلن شخص اوچون قاپینی آچیق ساخلاماق حدّینده بالاجا ایش اولا بیلر.)

7. بیر تیمین عضوی اولدوقلاری یادلاریندان چیخماز.

دوستلوق حسّی، چتین موقعیتلری دؤزولمه‌لی ائلیه بیلر. میرت اولماق بو موقعیتلری لذتلی‌ده ائلیه بیلر. چوخ کاریزماتیک انسانلار چتین شرایطده بئله سؤزلر دئیرلر: «عیبی یوخ، بو وضعیت هامیمیزا وار» سونرا او بیریلرین کناریندا تیمین هدفینه چاتماغا چالیشارلار.

8. احتراملی آدلار و عنوانلاردان استفاده ائلرلر.

کاریزماتیک انسانلار او بیرلرین آدلارینی یادلاریندا ساخلارلار و اونلارا خطابدا خوشلاری گلدیگی عنوانلاردان استفاده ائله‌مکله اونلاری سئویندیررلر. «سرهنگ» و «دکتر» کیمی عنوانلاری قازانماق واخت آپارا بیلر آما اونلادان استفاده ائله‌مگین خرجی یوخدور.

9. واقعی اعتماد به نفس ایله دانیشارلار.

گوپلامازلار آما چتین موقعیتلرده _مخصوصاً آیریلارین یاشاییشیندا تأثیرلی اولان زادلاردا- آرامش، ماراق و اعتماد به نفس ایله مسأله‌یه یاخینلاشارلار. اونلاردان بو سؤزلری ائشیتمک اولار: «یاخشی، باخاق گؤرک بو مسأله‌نی نئجه حل ائلیه بیلریک».

10. آیریلارین بیری-بیرینه تانیتدیرارلار.

ایکی نفره عینی آندا خوشلاری گله بیلن سؤزون نه اولدوغونو بیلیرسیز؟ «اجازه وئرین ....-ی سیزه تانیتدیریم.» البته بو گونلر هامیمیز رابطه آچماق فکرینده‌ییک. آما کاریزماتیک انسانلار اؤزلرینه ارتباطی شبکه قورماقدان علاوه آیریلارینا دا بو ایشده کؤمک اولارلار.

11. آیریلارین اؤزلری اوچون تصمیم توتماغا اجازه وئررلر.

کاریزماتیک انسانلار اؤز نظرلرینه ایمانلاری وار آما آیریلارینا دا فرقلی نظر صاحبی اولماغا اجازه وئررلر و اونلارا بو اجازه‌نی وئررلر کی اؤز مسیرلرین اؤزلری سئچسینلر. اوندان علاوه کاریزماتیک انسانلار اؤزگه‌یه اختیار وئرمکدن و سونرا اونلارا اعتماد ائله‌مکدن قورخولاری اولماز.

12. آیریلارینا اینادیقلارینی دیله گتیررلر.

فقط ایکی کلمه: «سنه اینانیرام» بو ساده کلمه‌لر بیر انسانی موفقیته آپارا بیلر. هامی‌نین تصدیق اولماغا احتیاجی وار. عینی حالدا بو تصدیق، دئین شخصی‌ده محبوب ائلر.

13. نوبه‌لرینی اونوتمازلار.

سئومه‌لی ایشلر و یا دا یوروجو ایشلر اولسون، سئویملی انسانلارین نوبه‌سی چاتاندا قورخمازلار و قاباغا گئدرلر. آیری عبارت ایله اونلار آیریلارینی تعریفله‌یرلر و یا باغیشلایاندیلار آما مثلاً ناهار پولو وئرمک اونلارین نوبه‌سی اولسا بو ایشدن قاچمازلار.

14. داها چوخ بیلمک اوچون قولاق آسارلار.

سئویملی انسانلار فعال و صادق قولاق آساندیلار. اونلارینان نظرلریز و خاطره‌لریز باره‌ده دانیشا بیلرسیز و اونلار سؤال سوروشماقلا سیزین سؤزلریزه قولاق آسدیقلارینی و مطلبه علاقه‌لی اولدوقلارینی گؤستره‌ده‌ بیلرلر. هامی‌نین واختی ارزشلیدیر آما اونلار واختلارینی سیزین اختیاریندا قویماقدان چکینمزلر.

15. مسئولیت قبول ائلرلر.

بو انسانلار ایشلرین و اشتباهلاری‌نین مسئولیتین قبول ائلرلر و نظارتلرینده اولاجاق ایشلرین کنترلونو اللرینه آلارلار. بونا گؤره دئمک اولار کی قابل اعتماد انسانلار چوخ سئویملی اولارلار.

16. حمایتلرینی دیله گتیررلر.

بیز کناریمیزدا قالان انسانلاری و بیزدن حمایت ائله‌مک حسّینی وئرن ایشلر گؤرن انسانلاری سئوریک. بیرینی یادا سالین کی لازم اولان زمان سیزدن حمایت ائله‌ییب. ایندی فکرلشین اوندا او شخص، سیزین اوچون نه قدر سئویملی ایدی.

17. همیشه سوروشارلار: «نییه اولماسین؟»

سئویملی انسانلار اکثراً مثبت باخان و عمل ائله‌ین انسانلاردیلار. کاریزماتیک انسانلارین سؤزو بودور: «بعضیلری‌نین عادتی وار هر شئیی اولدوغو کیمی گؤرسونلر و سوروشسونلار: نییه؟ آما من ایندیه‌جن اولمایان زادلارین فکرین ائلرم و سوروشارام: نییه اولماسین؟