پخیللیک نه‌دیر؟

بؤیوک تانری اینسانلارین سعادتی و خوشبتلیگی و اونلارین لقاءاللها چاتماقلاری اوچون تاریخ بویو مینلر رسول گؤندریب و سونونجو پیامبریمیز حضرت محمدی(صل‌الله‌علیه‌وآله) گؤندرمگینن اینسانین سعادتینه لازیم اولان برنامه‌نی تکمیل ائدیب. اَلیوم اَکمَلتُ لکم دینکُم.

بو گؤزل و کامیل برنامه‌ده اینسان جامیعه‌سی‌نین ناخوشلوقلاری تشخیص وئریلیب و اونلارین آرادان آپارماقلارینا دوزگون یوللار گؤستریلیب کی اگر بیز او یوللارینان گئدسک جامیعه‌میزی ساغلاملیغا طرف آپاراجاغیق.

جامیعه‌نین چوخلو و موختلیف ناخوشلوقلاری وار کی جهالت بو ابزارینان چالیشیر اونو فساد و قارانلیغا طرف آپارسین. بو ابزارلارین بیری پخیللیک و حسادتدیر. پخیللیک یا همان حسادت جانلی بیر ویروس کیمی جامیعه‌نین لاپ ضعیف یئرین تاپیب نفوذ ائتمگه باشلار. جهالت و نادانلیق اَن یاخشی بستردیر کی پخیللیک او نوقطه‌دن نفوذ ائتمگه باشلار. جاهیل و ضعیف اینسان اؤز جهل و عاجیزلیغین گیزلتمک اوچون چالیشار دؤره‌برینده‌کیلرین موفّق و چالیشقان اینسانلارا ضربه ووروب ضعیفلتمکله اونلاری اؤز سطحینه چاتدیرسین و بئله‌لیکله اؤز ضعفین گیزلتسین.

پخیللیک ویروسی قوی‌لشدیکجن فعالیت عرصه‌سین چوخالدیب جامیعه‌نین بؤیوک و قوی حیصه‌لرینی هدف توتار. آما ضعیف حالدا تکجه داریشدیغی شخصه صدمه ووروب اونو آرادان آپارار.

پخیللیک چوخ گوجلو و چالیشقان بیر ویروسدور. گئجه گوندوز تانیماز و هدفلرین چوخ دقت و آچیق گؤزونن سئچر. آما پادزهری «علم» و «بیلگی» موقابیلینده کَسَری یوخدور. یعنی بیز انسالار جهالتدن اوزاق گزیب بیلگی‌یه طرف گئدسک و بونو بیلسک کی جامیعه‌نین سعادتی اونون تک تک عضولری‌نین سعادتینه باغلیدیر و هر عضوون موفقیتی جامیعه‌نین خوشبتلیگی یولوندا بؤیوک بیر قدم‌دیر هئچ واخت اونلارین سعادتی بیزی اینجیتمیه‌جک و هامی‌میز بیر گمی موسافیری اولدوغوموزو بیلیب بو گمی‌نین سعادت ساحلینه چاتماسینا چالیشاجاغیق.