غدير بايرامي عمللري/ قارداشليق عقدي
قارداشليق عقدي، جامعهدهكي رابطهلري گوجلنديرمك اوچون، اسلامين بؤيوك ابتكارلارينين بيري و غدير بايرامي گونونون مخصوص عمللريندندير. اسلام پيغمبري (ص) ايكي خاص زماندا هجرتدن اوّل و هجرتدن سونرا مسلمانلارين انسجاميني ساخلاماق اوچون، مسلمانلار آراسيندا قارداشليق علاقهسي ياراتدي و بوتون مسلمانلاري ايكي ايكي بيري بيري ايله قارداش ائلهدي. پيغمبرين (ص) معياري مسلمانلارين هر بيرينين قارداشيني معيّن ائتمكده، اونلارين خصلتلرينين متناسب اولماسي و ايمان درجهلرينين ياخينليغي ايدي.
غدير سؤزو «گؤل» و «ياغيش سويو ييغيشان يئر» آنلاميندادير. خُمّ غديري مكه و مدينه شهرلري آراسيندا و «جُحفه» آدلي بير يئردهدير. اسلام پيغمبري (ص) حجة الوداع حجّينده ذي الحجهنين 18-ينده، الله-ين امري اينن اوزون بير خطبهدن سونرا حضرت علي بن ابي طالبي (ع) اؤز وصيسي و خليفهسي كيمي جماعته تانيتديردي.
اسلام پيغمبري (ص) غدير گونو بير ساعتليق خطبهدن سونرا «من هر كيمين آغاسييام، عليده اونون آغاسيدير» سؤزونو اوچ دفعه تكرار بويوردو كي مسلمانلارين و تاريخين قولاغيندا قالسين. حضرت بو گونو بايرام آدلانديريب مراسميني يئرينه گتيردي. چاديريندا اَيلَشيب تبريك دئيَنلردن قارشيلادي.
اميرالمؤمنين(ع) و آيري مطهّر اماملار دا (ع) بو گونو عزيز ساييب اونون اوچون عمللر و فضيلتلر ساييبلار:
1. اوروج توتماق كي 60 ايل گناهين كفارهسي ساييلير.
2. غسل ائتمك.
3. امير المؤمنين (ع) زيارتيني اوخوماق.
4. ايكي ركعت نماز قيلماق.
5. بو گون ندبه دعاسيني اوخوماغا تأكيد اولوب.
6. دين قارداشلاريني گؤرنده بو دعاني اوخوماق: الحمدالله الذي جعلنا من المتمسكين بولايه اميرالمومنين و الائمه عليهم السلام.
هابئله بوگونده گؤزل و تميز پالتارلار گئيينمك، انسانلاري سئوينديرمك، اونلاري باغيشلاماق، صله رحم، پاي وئرمك، جماعتين مشكللريني حل ائتمك، مؤمنلر و دوستلارلا گؤروشمك و پيغمبره (ص) صلوات گؤندرمگه تأكيد اولوب.
قارداشليق عقديني اوخوماق
قارداشليق عقدينين اوخونماسي غدير بايرامي گونونده تأكيد اولسا دا بو گونه مخصوص دئييل و ايلين بوتون گونلرينده اونو اوخوماق اولار. بو عقدي هر ديل و سؤزله جدّي اولماق شرطي ايله اوخوماق اولار. آما معمول رسمي بئلهدير: انسان اليني دوستونون ساغ الينه وئره و دئيه:
واخيتك في الله و صافيتك الله في الله و عاهدت الله و ملائكته وكتبه و رسله و انبيائه و الائمة المعصومين عليهم السلام علي اني ان كنت من اهل الجنة و الشفاعة و اذن لي بان ادخل الجنة لا ادخلها الا و انت معي
سونرا دوست دئيه: قَبلت. سونرا او دئيه: اسقطت عنك جميع حقوق الاخوة ما خلا الشفاعة و الدعاء و الزيارة.
بئلهليكله اونلار ايكيسي معنوي قارداش اولاجاقلار.
عقد صيغهسينين متنينده گلديگي كيمي بو قارداشليغين اقتضاسي، فقط مقابل طرفي زيارت، دعا و شفاعتده شريك ائلهمكدير.
قارداشليق عقدي اخلاقي بير تعهّددير بونا گؤره ايكي طرفين توافقي ايله لغو اولا بيلر و اونون لغوينه مخصوص صيغه يوخدور.
قارداشليق عقدينده ارث، مَحرمليك و . . . كيمي فقهي احكام يوخدور. يعني مثلاً ايكي نفر معنوي قارداش اولاندا بيري بيرلريندن ارث آپارمازلار و باجيلاري بيري بيرينه مَحرم اولماز و هابئله بو عقد آغا و خانيم آراسيندا اوخونماز.
بو موضوع ایله علاقه لی آیری یازی:
علینین (ع) ویلایتی بؤیوک سونّی عالیمین نظرینده
بو وبلاگدا دين و مختلف موضوعلاردا ال يازيلاريم و عرب دیلیندن چئویردیگیم یازیلار اولاجاق.