هوانین چیرکلیگی سرطان گتیرر
جهانی بهداشت سازمانی نهایتده بؤیوک شهرلرده یارانان چیرکلی هوانین سرطانلی اولدوغونو آچیقلادی.
آسوشیتدپرسین وئردیگی خبره گؤره «سرطان بارهسینده بینالمللی تحقیقات سازمانی» (IARC) هوانین چیرکلیگی، دخانیات و اولترا بنفش ایشیقلاری کیمی، سرطان عاملی اولا بیلر.
بو نتیجه فرانسهده جهانی بهداشت سازمانینا باغلی اولان بیر متخصص هیأتی ایله مشورتدن سونرا اله گلدی.
IARC-نین سرطانلی مادّهلری دَیَرلندیرن بیر بؤلومونون رئیسی، کورت استریف بو بارهده دئدی: چوخلارین نفس آلدیغی هوا مرکّب سرطانلی مادّه ایله قاریشیب.
اونون دئدیگینه گؤره «محیطی سرطان عامللرین» اَن اساسلیسی هوا چیرکلیگیدیر و محیطدهکی سیگار توستوسو ایکینجی درجهده یئر آلیر.
بو نظر دنیانین باشا باشیندا 1000 –دن چوخ آنالیزدن سونرا اعلام اولوب. آنالیزلر بو نتیجهیه گتیردیلر کی چیرکلی هوا، آغ جیگر سرطانینا سبب اولا بیلر.
IARC-نین وئردیگی آمارا گؤره 2010-جو ایلینده دنیادا 222000-دن آرتیق انسان، هوا چیرکلیگیندن عمله گلن سرطان تأثیرینده اؤلوبلر. بو سازمانین اعلامینا گؤره هوا چیرکلیگی مثانه سرطانینا دا گتیرب چیخارا بیلر.
استریفین دئدیگینه گؤره، بؤیوک شهرلرده هوا چیرکیلیگینین چوخ اولدوغونا گؤره بعضیلری ماسکدان استفاده ائلهمکله هواداکی معلق اولان ذرّهلردن قورونا بیلرلر آما هوا کیفیّتینی دوزلتمک اوچون دولتلر طرفیندن اساسلی ایشلر گؤرولمهلیدیر.
بو وبلاگدا دين و مختلف موضوعلاردا ال يازيلاريم و عرب دیلیندن چئویردیگیم یازیلار اولاجاق.