اسلامین آزاد دوشونجه ایله مشکلی یوخدور
اسلامین آزاد دوشونجه ایله مشکلی یوخدور، بلکه بو مسلمانلار و اسلام شناسلاردیکی بعضاً آزاد دوشونجه ایله مشکللری اولور. آزاد دوشونجهنین اساس مانعلرینین بیری شخصیّتلرین حددن آرتیق مهم اولماسیدیر کی منطق قایدالارینی آیاقلاییب شخصیتلری حفظ ائلیریک.
بیر قضیهده صغری، کبری و منطقی شرایطین مجموعسوندان بیر نتیجه اله گلیر. آما بو الزاماتدان علاوه کی عقله و منطقه مربوط اولور، آیری و اضافه مانعلر قویولاندا حقیقتده آزاد دوشونجهنین یولو باغلانیر.
اسلام هئچ جوره آزاد دوشونجه ایله مشکلی یوخدور بلکه بو مسلمانلار و اسلام شناسلاردیلار کی معمولاً آزاد دوشونجهیه مانع اولورلار. قرائتلر فرقلی اولا بیلر، تفسیرلر فرقلی اولا بیلر. مثلاً من اسلامی اؤز قرائتیمله حق بیلیرم. ایندی بیر آیریسی منیم قرائتیمله فرقلی نظریهلر مطرح ائلهسه من اونونلا مخالفته باشلایاجاغام. حقیقتده اونون نظریهسی ایله مخالفت ائدن منم، اسلام یوخ. اسلام، الله ارادهسیندن باشقا هئچ نه دئمیر. اللهین ارادهسیده بئلهدیر کی انسان عقل و دوشونجهسینی ایشه سالسین و آزاد دوشونسون. بو الله مشیّتیدیر، بیزیم اونون قارشیسیندا دایانماغا حقّیمیز یوخدور. «لا اکراه فی الدین».
اللهین ارادهسی بونا شامل اولوب کی بیز منطق، قرآن و استدلال چرچیوهسینده دوشونک. آما بو دوشونجهنین محصولو فلان کسین نظریهسی ایله مطابق اولمالیدیر یا یوخ؟ دا بونو دئمک اولماز. نتیجه هر نه اولسا اونا احترام قویماق لازمدیر.
بوتون فقیهلر و فیلسوفلار اسلام مفسّریدیلر و من بونا ملتزم دئییلم کی حتماً جناب عمرو و یا جناب زیدین نظریهسی ایله مطابق اولان نتیجهیه یئتیشم. بعضاً بیر نظریه مطرح اولار و منطق چرچیوهسیندا دفاع اولونار بیرینینده سؤزو اولسا منطق یولو ایله جواب وئرمهلیدیر آما متأسفانه بعضاً شخصیّتلره منطقدن آرتیق اهمیّت وئریلدیگینه گؤره آزاد دوشونجهیه میدان وئریلمیر.
بو وبلاگدا دين و مختلف موضوعلاردا ال يازيلاريم و عرب دیلیندن چئویردیگیم یازیلار اولاجاق.