بوتون دینلرده منجی واردیر
بودایی دینینده آخرالزماندا ظهور ائدن بودالاردان سؤز گئدیر. هندو دینینده ده «کریشنا»یا مختلف تجلّیلر تانیرلار کی انسانلارین نجاتی اوچون «کریشنا»نین سون تجلّیسی آخرالزماندا باش وئرهجک. وحیانی دینلرده، _اسلام، مسیحیت و حتّا زردوشتلیکده_ آخرالزماندا ظهور ائدن شخصه نسبت وئریلن ایشلر، بودا و هندو دینلرده ده آخرالزماندا گلن شخصه نسبت وئریلیر.
اسلامدا آخرالزمان منجیسینه، ایکی مختلف باخیش وار. بیری شیعه طرفیندن و بیر اهل سنّت طرفیندن. بیز شیعهلری او حضرتین وارلیغینا و غیبتده اولدوغونا اینانیریق آما اهل سنّتین اعتقادینا گؤره، او حضرت هله ولادت تاپماییب و آخرالزماندا دنیایا گلهجک. آما امام زمانین (عج) گؤرهجگی ایشلر بارهده شیعه و اهل سنّتین اعتقادی بیردیر.
نهجالبلاغه کتابیندا مهدویّت بارهسینده درین بیر مقاما اشاره اولوب. حضرت علی (ع) اوردا بویورور: «آخرالزماندا «يعطف الهُدي علي الهوي إذا عطفوا الهوي علي الهدي» یعنی هدایتین ضلالته و «الهوی»یه چئوریلدیگی زماندا امام زمان (عج) «الهوی»نی هدایته چئویرر». «الهوای» آشاغی دوشمک و پیسلشمک آ«لامیندادیر. «الهدی»نی هدایت قارشیسیندا گتیرمکله بو مهم نکتهیه اشاره اولور کی آخرالزماندا هدایت قاپیلارینین هامیسی آچیق اولاجاق.
نهج البلاغهده تحقیق ائدنده، «هوی» و «هدی» نین بیر-بیرینه مقابل معنادا ایشلنمهسینه دفعهلرله راستلاشیریق. بو گؤزل کتابدا «تقوی» سؤزو ده «هدی»نین یئرینده اوتوران کلمهلردندیر.
حضرت علی (ع) تقوی کلمهسینی معنا ائدنده اونو انسانی تعادللی اولماغا کؤمک ائدن بیر گوج کیمی تانیتدیریر. حضرت علی (ع) بویورور: «تقوی، انسان اونون بئلینه مینمیش حمیل بیر آت کیمیدی کی جیلوو اونون الیندهدیر و اونو سعادته و مقصده چاتدیرار. آما «هوی» نوختاسی قیریلمیش یاراماز بیر آت کمیدیر کی جیلووو راکب الینده دئییل و هر آن اونو یئره ییخا بیلر». بو اساسدا امام زمانین (عج) اساس شاخصهسی اعتدالدیر. بو اعتدال حیاتین بوتون عرصهلرینده ظاهر اولور. او جملهدن اخلاق، دیندارلیق، امنیّت و . . . عرصهلرینده.
بو وبلاگدا دين و مختلف موضوعلاردا ال يازيلاريم و عرب دیلیندن چئویردیگیم یازیلار اولاجاق.