ایسلامی عیرفاندا اوروج
اوروجون فلسفهسی ظاهیری اؤتمک و ایلاهی ویصالا چاتماقدیر. عاریفلر قورآنین آیهلریندن ایستیفاده ائدیب بو نتیجهیه یئتیشیرلر کی اوروج بونا گؤره واجیب اولوب کی اینسانی ایلاهی ویصالا چاتدیرسین.
ایسلامی عیرفاندا شرعی حؤکمدن باشقا آیری بیر شئی یوخدور آما عاریفلرین اوروجو عادی جماعتدن فرقلی اولور . ایکی دلیله گؤره: بیر بو کی عاریفلرین توتدوقلاری موستحبی اوروجلار, عادی جماعتین توتدوقلاریندان چوخ اولور. ایکینجی دلیلده بودور کی اونلارین اوروجلاری کیفیت جهتیندن فرقلی اولور. مثلاً قورآندا گلیب کی آللاه اوروجو عیبادت کیمی موقرر ائدیب تا جماعت تقوایا ال تاپسین, آما عاریفلر بو حدّه قانع دئییللر. عاریفلر قورآنین آیهلریندن ایستیفاده ائدیب بو نتیجهیه یئتیشیرلر کی اوروج بونا گؤره واجیب اولوب کی اینسانی ایلاهی ویصالا چاتدیرا.
بونا گؤره عاریفلر اؤز کیتابلاریندا دئییرلر کی اوروج شریعتده یئییب ایچمکدن چکینمک معناسیندادیر, آما حقیقتده اوروج دونیادان اوز چئویرمک و اونا دیقّت ائتمهمکدیر. یعنی نه اینکی بیز یئییب ایچمکدن واز کئچیریک, بلکه بوتون کائیناتا دا گؤز یوموروق و فقط آللاهی گؤروروک. بونا گؤره دئییردیلر بدنین اوروجو, بدنی یئمکدن ساخلاماقدیر, آما اورگین اوروجو, اورگی شیطان وسوسهلریندن و گوناه باعیث اولان فیکیرلردن اوزاق ساخلاماق معناسینادیر.
عاریفلرین اینامینا گؤره اوروج گرک ایستیغراق مرحلهسینه یئتیشدیره. یعنی ایلاهی موشاهیده دریاسینا گیرهله کی اوردا اوروجون اورتاسیندا آللاهی گؤرهلر. بونا گؤره لقاءاللها اینانیردیلار. معنوی اوروج اودور کی اوندا فقط معنویت و تماماً آللاها دیقّت ائلهمک وار.
مولانا بویورور عادی اینسان آغزینی باغلیر کی آرتیق غذا یئمهسین, آما عاریفلر آغیزلارین باغلیرلار کی آللاهدان سونرا هئچ نهیی گؤرمهسینلر. عاریفلر وصل دالیسیجاندیلار و بونا گؤره اوروجلوق آیین نه فقط برکت آیی بلکه ایلاهی وصل آیی بیلیرلر.
جماعت اوروجلوقدا اوروج توتور کی بیر شئی اله گتیرسین و بیر ثواب آپارسین, آما عاریفلر اوروج توتورلار کی آللاهی اله گتیرسینلر. بوردادیر کی عاریفلرینن آیریلارین فرقی بیلینیر.
بو وبلاگدا دين و مختلف موضوعلاردا ال يازيلاريم و عرب دیلیندن چئویردیگیم یازیلار اولاجاق.