نييه توپلوملاردا بعضي اؤنملي اولايلارا كي كوتله ايچينده اهميته ماليكدير اويقون و تناسوبلو عكسالعمل
آللاهين آديله
گاهدان گؤرونور جاميعهده اؤنملي ساييلان موضوعلارا اهميت وئريلمير و كناريندان راحاتجاسينا واز كئچيريلير.
هر بير توپلوم اؤزونو ديري و آياق اوسته ساخلاماغينا گؤره بير پارا قيرميزي چيزگيلري وار كي اونلارين ساغلام قالماسي توپلومون ياشامينين دوامي و اونلارين پوزولماسي توپلومون ضربه يئييب داغيلماسي دئمكدير.
بيز موسلمانلارين دا بير پارا قوتساللاريميز(موقدسّاتيميز) وار.دينيميزين بويوردوغونا و دريندن ايناديغيميزا اساساً بو قيرميزي چيزگيلر توهين، ايفتيرا و سايير يارامازليقلارا معروض قالسالار اونون قارشيسيندا ساكيت اوتورماماليييق. چون بيليريك كي اونلارين آياقلانماسي و آرادان گئتمهلري بيزيم داغيلماغيميز و محو اولماغيمزا باعيث اولاجاق. آما گؤرهسن نييه بيزيم جاميعهميزده دينيميزه اولان توهينلر قارشيسندا اويغون جواب گؤرموروك؟ اصلاً نييه اؤزوموز بو ساحهده گركلي اولان ايشلري ائتميريك؟ گؤرهسن ايناملاريميز ضعيفدير و بيز اوجور كي گرك ايسلامي اينانماميشيق؟ يا باشقا عاميل بو آرادا رول اوينايير؟
منجه بئله دئييل. دونيانين اَن دوغرو و دوزگون آداملاريني شيعه موسلمانلاري آدلانديريرلار كي تاريخ بويو هر تور ايشكنجه و باسقي آلتيندا اولاركن دين و ايناملاريندان اَل چكمهييبلر. بو اساسدا بيزلرين ايناميندا هئچ موشكول اولماماليدير. تكجه موشكول اوردا اولا بيلر كي بيز قيرميزي چيزگيلريميزين پوزولماسيني دريندن اينانميريق. بو بير ميثاللا داها آرتيق آيدينلاشار: طيبّي بيليگي اولمايان بيريسينين بير طرفي يارالانسا اونون ضيد عفوني و پانسيمان ائتمهسينه چاليشماز و بو ايشي يارانين چيرك ائتمهسيني سئومگه خاطير ائتمير بلكه سونوجوندان خبرسيزدير و بيلمير كي بو يارا هر نه تئزراق تميزلنمهلي و ضيد عفوني ائتمهليدير. بو خبرسيزليغين سوچو او شخصده يوخ بلكه او جاميعهنين طبيبلريندهدير كي جماعاتين طيبّي بيلگيلريني كيفايت قدهر آرتيرماييبلار.
ايندي كي بيزيم جاميعهده كوتلهنين(عمومون) ديني تعصوبلري ضعيف گؤرونور بونون گوناهي جماعاتدا يوخ بلكه بيزلردهدير. بيز اونلارا اؤيردنمهميشيك كي توپلوموموزون اساس ديرَكلري نهلرديلر و اونلار ييخيلسالار بيز آللاه قارشيسيندا سوروملو و سوچلو اولاجاغيق. يوخسا جماعاتيميزدا هئچ تقصير يوخدور. بونو ايثبات ائتمك چتين دئييل. ايمانلي بيريسينين يانيندا ايمام پئيغمبره و يا باشقا قوتسال ايناملارا توخونولسا او بو دوروما دؤزنمز و حتماً توهين ائدن شخصي يئرينده اوتوردار و بو يولدا هئچده قورخوسودا اولماز. آما كوتله سويّهسينده ايش بير بالاجا فرقلي اولور چون او ساحهده بيزلر سوروملويوق. بيزيك كي گرك مسألهني دوم-دورو جماعاتا آيدينلاداق كي اونلاردا اويقون عكسالعمل نيشان وئرهبيلسينلر.
تأسوفله بيزلرين بير پاراسينا مسأله كيفايت قدر آيدينلاشماييب، هله قالسين كي جماعاتا اؤيرهدك. دؤنوب دئييريك جماعات نييه فيلان ساده مسألهيه عكسالعمل نيشان وئرديلر آما دينيميزه و اينانجلاريميزا توهين ائدنلره بير سؤز دئمهديلر. بيزلرين بعضيسي اؤز ضعف و باجاريقسيزليغيميزي گيزلتمك اوچون دوستلاريميزين ييخماغينا چاليشيب اونلاري چئشيتلي ايتّيهاملارلا هدهلهييريك. آللاهدان بئله اينسانلارين هاميسينا آرتيق بيليك و سعادت ديلهييرم.
هلهليك . . . .
بو وبلاگدا دين و مختلف موضوعلاردا ال يازيلاريم و عرب دیلیندن چئویردیگیم یازیلار اولاجاق.