الغدیر صاحبی علامه امینی
غدیر خم واقعهسینی مطرح ائلهین الغدیر کتابی اسلام دنیاسینین لاپ بؤیوک کتابلاریندان و مسلمانلارین وحدتینه لاپ دَیَرلی سندلردن ساییلیر.
بو کتابین یازانی بؤیوک علامه؛ عبدالحسین امینی ایدی کی1282 هجری قمری ایلینده آذربایجانین سراب شهرینین سویوقلار کندینده دنیایا گلیب.
عبدالحسینین جدی «امین الشرع» او زمانین بؤیوکلریندن ایدی و اونون آدینا گؤره علامه «امینی» یه مشهور اولوب.
بو بؤیوک عالم 14 یاشیندان تبریزین طالبیه مدرسهسینده تحصیله باشلادی و 6 ایل سونرا نجف اشرف مشرف اولدو. اجتهاد درجهسیه چاتاندان سونرا اونون مجتهدلیگی او زمانین بؤیوک مجتهدلری طرفیندن تأیید اولوندو.
او چوخلو کتاب و تألیفاتیندان سونرا لاپ مهم اثری اولان و اسلام دنیاسینین بیرلیگینده بؤیوک آددیم ساییلان «الغدیر» کتابینی یازماغا باشلادی.
شیعهنین بؤیوک عالمی سنّی بؤیوکلریندن و پیغمبرین یاخین صحابهسیندن نقل اولان حدیثلر و روایتلری بیر یئره ییغیب شیعه اعتقادلارینین حقانیتینی ثابت ائلهمگه گوجلو بیر کتاب یاراتدی. بو کتابین استدلالی او قدر گوجلودور کی چوخ سنّی شخصیتی اونون واسطهسی ایله حقیقتله تانیش اولدو. عصار العمار عراقلی محقق بو بارهده یازیر: علامه امینی الغدیر کتابی ایله غدیر خم حدیثینی سنّیلرین جانیندا تازادان دیریلتدی. من اؤزوم سنی ایدیم بلکه وهابی ایدیم آما الغدیری اوخویاندان سونرا شیعه اولدوم.
علامه بو کتابی یازماق اوچون 40 ایل بویونجا هند، مصر، ترکیه، سوریه و عراق کیمی مختلف اؤلکهلره سفر ائلهدی.
علامه امینی عمرونون آخر 17 ایلینی امیرالمؤمنین علی (ع) آدینا مُزیّن اولان و 63 مین جلد کتابی اولان بؤیوک کتابخاناسینین کناریندا و علوی حرمین یاخینلیغیندا سوودو.
نهایتده 1349 هجری شمسی ایلین تیر آیین 12-سینده جمعه گونو 70 یاشیندا حقین رحمتینه قووشدو.
بو وبلاگدا دين و مختلف موضوعلاردا ال يازيلاريم و عرب دیلیندن چئویردیگیم یازیلار اولاجاق.