وظیفه‌شناس انسانلار چوخ چالیشارلار و ایده‌آل اولماغا طرف گئدرلر. اونلارین ایشی تأثیرلی اولار و ایشلرینده لاپ یاخشی اولماق ایستر لر.

وقتده دقیق اولماق، اطمینانلی اولماق، زماندان فایدالی استفاده و قایدالاردان جدّیتلی تبعیت ائله‌مک وظیفه‌شناس انسانلارین خصوصیتلری ساییلیر. هر انسانین مختلف شرایطه نئجه عکس‌العمل وئرمه‌سی اونون هانسی شخصیته صاحب اولماسیندان آسیلیدیر.

روانشناسلار انسانلار اوچون بئش شخصیت تیپی تعریفله‌ییبلر کی انسانلاری ساده فورمدا طبقه‌لندیرمگه کؤمک ائلیر. بو شخصیتی تیپلر «بئش بؤیوک شخصیتی خصوصیت» ده آدلانیب کی انسانلارین فردی خصوصیتلری‌نین توصیفی ایله اونلارین رفتارینی تانیماغا کؤمک ائلیر.

لوییس گولدبرگین ایشلتدیگی بو مئتود، انسانلارین تقریباً هامیسینا شامل اولور و اونلاری دوزگون شکلده بؤلوشدوره بیلیر.

انسانلاری بئش عمده شخصیتی تیپی وار کی اونلارین هانسی شغلی سئچمکده و نئجه یاشاماقلاریندا مهم نقش اویناییر. هرچند بو خصوصیتلر انسانلاردا مختلف درجه‌لرده اولور آما هانسی‌نین داها گوجلو اولماسی انسانلارین رفتاریندا مستقیم تأثیرینی قویور.

عصبی‌لیک:

عصبی‌لیکلری شدّتلی اولان انسانلارین عاطفی لحاظدان ثباتلاری آز اولور. اونلار کیچیک زادلارا حددن آرتیق عکس‌العمل گؤستریرلر و تئز ناراحت اولورلار. اونلار استرسی کنترل ائله‌مکده مشکله دوشورلر و منفی روحی حالت مقابلینده دفاعسیزدیلار. عصبی‌لیکدن آسیلی اولان عاطفی ثباتین آزلیغی اونلارین روحی مشکل‌لرینده تأثیرلی عامل ساییلیر. کیچیک زادلار اونلاری مضطرب ائلر و حیرصلندیرر. تحقیقلر بئله انسانلارین افسرده‌لیک معرضینده اولدوغونو گؤستریر.

بو انسانلار هر زادین منفی طرفینی گؤرمگه میل‌لری وار و چوخ راحت منفی عاطفی حالته زویورلر.

ائشیگه‌ میل‌لی اولماق:

بو خصوصیت انسانلاری، اجتماعی رفتارلاریندا گؤزه ‌گلیم تأثیر بوراخیر. ائشیگه‌ میل‌لی اولان انسانلار شدید حالتده اجتماعی اولورلار. اونلار اجتماعی مهارتلره صاحب اولماغا میل‌لیدیلر و دوستیانا ترپشیرلر. اونلار جماعت ایله تعاملده اولماغی سئویرلر قونلاقلیق کیمی اجتماعی فعالیتلرده حاضر اولماغی خوشلورلار. اونلار دقّت جلب ائله‌ین، چوخ دانیشان، مشتاق و درین بحثلری سئون انسانلاردیلار. اونلار آیریلاری ایله دانیشاندا جسارتلی و چوخ راحت اولورلار. تک اولان زمانلار ناراحتلیق چکیرلر اونا گؤره همیشه بیر جمعین ایچینده اولماغا چالیشیرلار. انسانلارلا اولماغی سئون معلم‌لر، سیاستچیلر و ساتیجیلار، بو تیپین نمونه‌لری کیمی ساییلا بیلرلر.

موافق و تطبیق یئین انسانلار:

بو شخصیته صاحب اولان انسانلار ادبلی و اورک یاندیران اولورلار. اونلار اؤزگه‌یه کؤمک ائله‌مکدن لذت آپارارلار. اونلارین اورکلری مهربان اولوب اؤزلری اطمینانلی و کؤمکچی انسانلاردیلار.

اونلار اطرافداکیلارلا اورک بیر اولوب اونلارا احترام قویوب اونلار باره‌ده نگران اولورلار.

وظیفه‌شناس انسانلار:

انضباظلی اولماق و وظیفه‌شناسلیق بو تیپده‌کی انسانلارین ایکی مهم خصوصیتی ساییلیر. اونلار مسئولیت قبول ائله‌ی،ن یاخشی سهمانا سالان و هدفه چاتماقدا برنامه‌لی انسانلاردیلار. اونلار یاشاییشدا موفقیته چاتماق اوچون لازم اولان ایشلرین هامیسینی گؤررلر. اونلار ایشلری‌نین تأثیرینی قاباقجادان بیلمگه میل‌لیدیلر.

اونلار ایشلرینی ایناندیقلاری اخلاق چرچیوه‌سینده دوزگون یئرینه گتیریرلر. اونلارین دانیشیغی چوخ احتیاطلی اولور و هئچ واخت فکرسیز عمل ائله‌مزلر.

وظیفه‌شناس انسانلار چوخ چالیشارلار و ایده‌آل اولماغا سعی ائلرلر. اونلار عشق ایله ایش گؤررلر و ایشلری تأثیرلی اولار و ایشلرین لاپ یاخشی اولماغا میل‌لیدلر. زماندا دقیق، اطمینانلی و قایدالاری رعایت ائله‌مک اونلارین خصوصیتلریدیر.

بئله انسانلارین ائولری تمیز و سهمانلی اولار.

آچیق و قبول ائله‌ین انسانلار:

آچیق و قبول ائله‌ین انسانلارین تعصبی اولماز و تازا ایده‌آل‌لاری راحت قبول ائلرلر. اونلار گونده‌لیک روتینی خوشلامازلار و همیشه تازا زادلارین دالیسیجا اولورلار. اونلار بوروشوق تاپماجا و معمالارا جواب تاپماغی سئویرلر. عالملر و هنرمندلرده یوخاری حدده خلاقیت و قبول ائله‌مک واردیر. آز قبول ائله‌مک آیدین دوشونجه‌لی باخیشلارین قبول ائله‌مک معناسیندادیر.