عالملر انسانلاری یوزده یوز ضریبی ایله بئیین دالغالاری ایله تانیماق امکانی اولدوغونو بیلیبلر.

انسانلارین مختلف محرکلره اولان عکس العمل‌لری نه قدر کیچیک‌ده اولسا، عالملرین تازا تاپدیقلارینا اساساً اونلاردان انسانلارین شخصیتی باره‌ده چوخ زادلار اله گتیرمک اولار.

اونلار بئله اینانیرلار کی انسانی حتی رابطه‌لری منطقسیز اولان کلمه‌لر و یا تصویرلر مقابلینده قویسان، بئیین دالغالاری اوزوندن مهم و گیزلی اطلاعاتا ال تاپماق اولار.

نیویورکدا بینگمتون دانشگاهی‌نین عالملری دقّته لایق بیر آنالیز ائله‌ییبلر.

اونلار 50 نفردن 500 فرقلی و مختلف مضمونلاردا اولان عکسلره خیره اولماغی ایسته‌ییبلر. اونلار بو تصویرلره باخان زمان اونلارین بئیین فعالیتینی یوخاری دقّت ایله ثبت ائله‌ین مخصوص هدست‌لر باشلارینا سالمیشدیلار.

عالملر گؤردولر کی اونلارین بئیینلری اوخشار تصویرلره فرقلی عکس‌العمل نشان وئریرلر و جالب بوراسیندادیر کی اونلارین آراسینداکی فرق او قدر چوخ اولور کی کامپیوتری سیستملر اونلاری یوزده یوز دقت ضریبی ایله تشخیص وئره بیلیرلر.

بو عالملرین ابتدائی تحقیقلری Brainprint آدلی لاپ معتبر بئیین و اعصاب نشریه‌لرین بیرینده چاپ اولوب. بو تحقیق نتیجه‌سی گؤستریر کی بئیین دالغالاری ایله مشخص بیر شخصی 32 نفرین ایچیندن یوزده 97 دقت ضریبی ایله تشخیص وئرمک اولار. سونرا تصویرلری کلمه‌لرین کنارینا قویماقلا بو ضریبی لاپ یوخاری حدّه یعنی یوزده یوزه چاتدیرماق اولار.