اوشاغین تربیتی اوچون هئچ واخت تئز دئییل
بیر یاشلی اوشاق، یئمگینی بوشقابدان ائشیگه آتاندا، والدین اونونلا نئجه رفتار ائلهمهلی اولدوقلارینی بیلمیرلر. بیر طرفدنده بئله بیلیرلر اوشاغین یاشی آزدیر و اونو تربیت ائتمک اولماز. آما بئله دئییل. اوشاغا خوش دیلله اؤیرتمک اولمایاندا، اولا بیلر یاخشی پیسی اونا اؤیرتمک لازم اولسون. والدین اکثراً تربیتی تنبیهله عوضی توتورلار. آما تربیتین بیناسی اؤیرتمگه دایانیر. بیر یاشلی اوشاغا محدودیّتلری اؤیرتمک لازمدیر. چوخ ساده یوللارلا اوشاغی دوزگون رفتارا طرف هدایت ائتمک اولار.
اوشاغین الیندن ائلهدیگی سهوه گؤره غضبلندیگیز زمان اونا چیغیرمایین، اؤزوزو کنترل ائدین. چیغیرماغیز باعث اولار اوشاق لج ائلهسین. چیغیرماق یئرینه اونو فوراً و آراملیقلا سئودیگی ایشه تشویق ائدین. مثلاً گؤرسز اوشاق مبلین دستهلرینه دیرماشیر، چیغیرماق یئرینه اونو یئره قویون و اویناتمالیلاری ایله اونونلا اوینایین یا اونا کتاب اوخویون. بو ایش، اوشاغین اشتباهلارینا مانع اولماقدان علاوه اونا بعضی ایشلرین گؤرمهمهلی اولدوغونو اؤیردر.
اوشاغا ناهاردان و یا شامدان اوّل، قیویر-زیویر یئمگی قدغان ائلهمیش اولساز، آغلاییب عالمی بیر-بیرینه قاتسا دا اونا بو ایشه اجازه وئرمهمهلیسیز. بیر دفعه تسلیم اولورساز، او بو ایشی اؤیرنر و همیشه چیغیرماق و آغلاماقدان اسلحه کیمی سیزین علیه-یزه استفاده ائلر.
اوشاغین تربیتی اوچون هئچ واخت اونا منطقسیز سؤز دئمهیین و دئدیگیزینده اوستونده دایانین. بو مسألهده آتا-آنا هماهنگ اولمالیدیلار. اولماز کی بیری اوشاغا طرف چیخسین و او بیری سؤزون یئریتمگه چالیشسین. بونون نتیجهسی مثبت اولماز.
باشاردیغیز قدر مثبت اولون. اوشاغا همیشه «یوخ»، «دَیمه»، «ائلهمه» و بو کیمی سؤزلر دئسهز، بیر مدّت سونرا داها سیزی حسابا قویمایاجاق. «یوخ» سؤزونو هر یئرده خرجلهمهیین اونو فقط ضروری یئرلرده ایشلهدین. مثلاً اوشاق یاندیران و خطرلی بیر شئیین اوستونه گئدنده تئز و قاطعیّتله «یوخ» دئمهلیسیز. خطرسیز یئرلرده لزومو یوخدور «یوخ»دان استفاده ائلیهسیز. مثلاً بونون یئرینه کی دئیهسیز: «یوخ! ماشیندا باشماق چیخارتمازلار». یاخشی اولار دئیهسیز: «ائوه یئتیشهنه قدر اونلاری آیاغیندا ساخلا ! یئتیشندن سونرا آیاقلین یئرییه بیلرسن».
اوشاقلار سیزین دئدیکلریزدن چوخ، عمللریزه باخیرلار. اؤیرشدیکلرینین چوخو بؤیوکلردن تقلید ائلهدیکلریدیر. بونا گؤره سؤزله اؤیرتمکدن علاوه، اونلارا بیر ایشی اؤیرتمکدن اؤترو او ایشی اونلارین گؤزونون قاباغیندا ائلهیین. مثلاً اوشاغیز دوستلارینی وورورسا، مهربانلیغی اونا عملاً اؤیردین. دوستلارینین بیرینی مهربالیقلا قوجاغیزا آلین. اوشاقدا اونلارا محبّت ائلهمگی اؤیرنر. یا مثلاً دیشلرینی یوماق اونا آغیر گلسه، هیجانلی اولماق اوچون بو ایشی بیرلیکده گؤرون.
یاخشی ایشلری تشویق ائدین. اوشاقلار بعضاً یاخشی رفتاری باجارمادیقلاری اوچون پیس رفتار ائلیرلر. بونا گؤره اونا یاخشی عملین نه اولدوغونو اؤیرتمهلیسیز. اوشاق یاخشی ایش گؤرنده اونو تشویق ائدین. بئلهلیکله او سیزین هانسی عمللردن خوشوز گلدیگینی بیلر.
بو وبلاگدا دين و مختلف موضوعلاردا ال يازيلاريم و عرب دیلیندن چئویردیگیم یازیلار اولاجاق.